السر وراء ( يلا بينا )

كتب عمر نبيل :

خلوني اعترف وأنا راسي منكم في الأرض من فرط الخجل والأسف والندم ، إني فاتني مشاهدة المسلسل الشهير ( العتاولة ) بكل ما فيه من أكشن وحبشتكنات وجدعنة الفنان أحمد السقا ، ع الرغم من كدة وصلني منه لقطات كتير زي لقطة ( المال الحلال أهو ) وغيرها كتير - الله يباركلها ويخليها السوشيال ميديا - والأهم طبعاً لقطات ( يلا بينا ) لباسم سمرة ، بل أجرؤ ع القول إني ع الرغم من عدم متابعتي للمسلسل فأنا تقريباً شفت كل الـ ( يلا بينا ) اللي قالها باسم سمرة ف المسلسل . 

السؤال هنا : ليه اشتهرت الجملة دي تحديداً من وسط كل المسلسل وبقت ترند ع السوشيال ميديا ويطلع منها ميمز وكوميكس ، لدرجة إنها توصل لشخص زيي ما تابعش المسلسل و- ماكدبش عليكم - ما اهتمش حتى يتابعه ، بس بقى يتابع ويستمتع بكل الميمز اللي بيظهر فيها باسم سمرة وهو بيقول جملته الشهيرة ؟ .. وأزعم كمان إني مش لوحدي ف كدة ، الغريب كمان إن الجملة مش مميزة نهائياً ، يعني مافيهاش حكمة ولا فلسفة ولا قافية ولا أي حاجة ، جملة كلنا أصلاً بنستخدمها كتير ف حياتنا العادية لدرجة إننا بننسى قلناها كام مرة .

أمال إيه الحوار !

طيب ، في أحيان كتير بيلجأ الممثل لما يسمى بالـ motif  أو اللازمة ، وهي تفصيلة قد تكون لفظية أو جسمانية أو تفاعل مع إكسسوار معين ، بيربطها الممثل بشعور أو موقف بحيث لما يستعملها ف موقف تاني يعملك إحالة أو بالبلدي كدة يرجعك للموقف أو الشعور الأولاني ، من غير ما يضطر يغير أدائه اللي مفترض يكون مرتبط بالموقف  الحالي .

تُهت ؟ طب واحدة واحدة والدنيا بسيطة.

الممثلين عادةً بيجسدوا بشر ، والبشر مشاعرهم معقدة على عكس الحيوانات ، مشاعرهم بسيطة وبيعبروا عنها بشكل واضح ، مثلاً الكلب لما بيتضايق بيهوهو ، لما بيجوع بيطلع لسانه ، لما بيفرح بيلعب ديله وهكذا .. مشاعر أحادية بسيطة وبيعبروا عنها في ساعتها بمنتهى الصراحة والوضوح ، مفيش كلب هيخفي جوعه لأنه في ميتينج مثلاً .

البشر بقى قصة تانية ، أولاً مشاعرهم مش بنفس البساطة ، يعني ممكن مثلاً يكون جعان وف نفس الوقت عايز ياكل أكلة معينة لكن عايز برده ياكل مع شخص معين والشخص المعين دة مابيحبش نفس الأكلة وف نفس الوقت هيحتاج يروح مشوار عشان ياكل مع الشخص المعين دة .. حسابات معقدة منيلة بستين نيلة .. ثانياً البشر عندهم ميزة الستر ، الستر دة جزء كبير منه له علاقة بقدرتهم على إخفاء أفكارهم أو رغباتهم ، يعني ممكن تكون جعان بس انت ف ميتينج مهم فماينفعش مديرك يسألك نفسك ف إيه الفترة الجاية تقوم تقوله واحد فول وإتنين طعمية ، ممكن تكون خايف بس معاك أطفال فماينفعش تظهر خوفك عشان مايخافوش هم كمان ، وهكذا.

أظن لحد دلوقتي جميل ، نيجي بقى للممثل.

الممثل دة في الحالة دي مهمته بقت صعبة ، يعني هو مثلاً بيجسد دور شخص جعان قاعد ف وسط ميتينج مهم ، والشخص دة بيخفي جوعه عن باقي الشخصيات اللي معاه ف الميتينج اللي هم زمايله ورئيسه المباشر والمدير ، لكن الممثل دة مطالب يعرفك انت كمشاهد اللي قاعد بتتابع من ورا الشاشة إنه الشخص دة ف وسط كل الكلام المهم دة ، هو قاعد بيحلم بسندوتش طعمية محشية وزود الطحينة الله يسترك.

هنا بقى تيجي أهمية اللازمة أو الـmotif  ، لأن دلوقتي الشخصية منقسمة بين حاجتين : شعور الجوع ، والموقف اللي هي فيه .. الممثل لازم يكون أدائه متناسق مع الموقف ، يكون قاعد منتبه ، كلامه جاد وف حالة من الوقار لأنه قاعد ف جلسة رسمية ، لكن لما يكون مرسخ جوا المتلقي من مشاهد سابقة إنه لما بيجوع مثلاً بيتململ في القعدة ، أو بيحسس على بطنه في الخباثة ، أو أثناء كلامه يرمي كلمتين هزار ليهم علاقة بالأكل أو يضرب مثال بالأكل أثناء كلامه عن الشغل ، فانت كمشاهد هنا عرفت معلومة عن الشخصية ، مايعرفهاش باقي الشخصيات في المشهد ، اللي هم زمايله والمديرين ، فبقى - خد بالك من اللي جاية دي - فيه سر بينك وبين الشخصية ، بينكم انتوا لوحدكم ، ودة أهميته إيه ؟

بالظبط كدة ، بيخلق رابط مهم بينك وبين الشخصية ، بيخليك تتوحد معاها وواخد موقفها ، يعني مجرد ما الممثل يعمل اللازمة دي ، هيخليك تنسى الميتينج والكلام المهم اللي بيتقال ، وتفكر بس إمتى الهري دة يخلص عشان ناكل لقمة ، ودة نفس تفكير الشخصية.

مثال مهم لـ لازمة جسدية هي اللي عملها نور الشريف في فيلم العار واللي حكى قصتها بنفسه ، حركة الرقبة اللي بتوحي إن هذا الشخص معتاد على لبس الجلابية ومش معتاد على البدلة اللي بتكون ماسكة ع الرقبة وتحسسك بعدم الراحة ، بالتالي ف أي موقف بتيجي فيه التفصيلة دي  فهي بتفكرك إن مهما الشخصية حاولت تبان قوية ومتماسكة ، فهي من جواها حاسة بعدم الراحة.

مثال مهم لـ لازمة لفظية هي اللي عملها صلاح عبد الله ف دوره الشهير في ( ريا وسكينة ) ، الحقيقة هم لازمتين مش لازمة واحدة ، الأولى ( تصدق يا فلان ؟ هتصدق إن شاء الله ) عشان يعرفك إنه كداب ، والتانية اللي بيقولها ف نهاية كل كلمة ( ولا هاه ؟ ) اللي هي توحي بالتراجع عن كلامه لو اللي قدامه مش عاجبه الكلام ، تعبيراً عن الجبن ، والإتنين مشهورين جداً لحد دلوقتي.

وطبعاً ماننساش إن أهم أدوار باسم سمرة وهو دور عبد المجيد في ( بنت اسمها ذات ) اشتهر برده بلازمة مهمة ، أكيد كلكم فاكرينها !

طب ماهي سهلة أهي ، أنا هختار كلمة وأفضل أكررها كل مشهد وتبقى كدة لازمة وتتشهر وأطلع ترند وكدة بقيت ممثل !

ماكنش حد غلب ، الموضوع مش بالسهولة دي ، لأن عشان تجيب لازمة تعلم لازم الناس تصدقها ، بمعنى لازم الناس تصدق إن اللازمة دي تطلع من الشخصية دي وتكون معبرة جداً ف كل موقف ، ودي بتحتاج أولاً شخصية مكتوبة كويس جداً ، ثانياً دراسة عميقة من الممثل - بمساعدة المخرج وأحياناً المؤلف كمان - لكل دواخل وتفاصيل الشخصية دي ، ودراسة لكل المواقف اللي بتمر بيها ، مش بتشوفوا الممثلين بيتكلموا ف اللقاءات عن المذاكرة ؟ أهي دي المذاكرة اللي بيتكلموا عنها.

ثالثاً تيجي بقى براعة الممثل برده بالاشتراك مع المخرج في استخراج لازمة أو تفصيلة تعبر عن الشخصية دي ، بالمناسبة ساعات اللازمة تكون من أفكار المخرج ، وساعات تكون موجودة في السيناريو أصلاً ، فتكون مذاكرة الممثل ليها علاقة بطريقة تنفيذها أو أدائها.

تبقى نقطتين مهمين مالهمش علاقة بشطارة الممثل أو خبرته ، النقطة الأولى هي المخرج اللي لازم يبرز اللازمة دي ويحط عليها خط ، سواء بزاوية كاميرا أو حركتها أو بتأثير موسيقى إلخ إلخ .

 النقطة التانية هي حضور الممثل وقبوله لدي الجمهور ، وهي النقطة اللي بيحظى بيها الممثل باسم سمرة ولا جدال ، سواء من الكاريزما الطبيعية الفطرية المميزة ليه أو سواء من تعلق الجمهور بيه عبر سنين من الأدوار  اللي عملها والأعمال اللي شارك فيها ، يعني جايز جداً جملة ( يلا بينا ) يقولها ممثل تاني وماكانتش تحقق نفس الانتشار ، وهذا ما يسمى الموهبة وهي من تلك الأشياء التي لا تشترى ، يعني لو قعدت تذاكر الدور سنين وكان معاك أحسن مؤلف وأحسن مدير تصوير وأحسن مخرج ، كل دة لا يعني شيء بدون الموهبة ، ولكن هذا حديث آخر.