تمان أدوار سينمائية انت محتاج تشوفها لـ ( صلاح السعدني )

كتب عمر نبيل :

فيه حاجة بحب أعملها مع الحبايب - وانت حبيبي أيها القاريء ولعلك تعلم ذلك - ألا وهي إني أشاورلهم على أعمال فنية أو أدبية تستحق الإطلاع سواءً بالمشاهدة أو بالقراءة ، ولكني هنا مش هكتفي بالإشارة حتى لا يتهمني إسلام عاكف صاحب المدونة بالتكاسل ، والأهم لأن هذه الأدوار تستحق الكلام وتسليط الضوء والاهتمام عليها.

صعب تلاقي حد لم يحزن ولم يرثى الفنان الكبير صلاح السعدني ، اللي ارتبطنا بملامحه وتعبيراته وصوته المميز ، واعتبرناه من خلال أعماله الدرامية واحد مننا ، طبعاً تبقى أعمال زي ليالي الحلمية وأرابيسك من الحاجات اللي دخلت واستقرت جوة كل بيت مصري.

ع الرغم من كل دة ، صعب تلاقي حد فاكر حاجة لصلاح السعدني في السينما ، ع الرغم إنه لم يبخل ببراعته عليها وقدر يطلع أدوار قوية فعلاً ، لكنها مالقتش حظها من الدعاية ممكن وسط الجمهور وبشكل كبير تعتبر منسية.

يمكن أكتر شيء مميز في السعدني - من وجهة نظري - هو أدائه الصوتي ، يعني مبدأياً مستحيل تغلط في تمييز صوته ، كمان قراءاته الكتيرة وسعة إطلاعه كانت مخلياه قادر يتنقل من منطوق أي شخصية ، سواء كان فلاح أو مثقف أو من وسط البلد ، بسلاسة تامة ، بمعنى ماتحسش الألفاظ اللي بيقولها غريبة على لسانه ، بيمررها وكأنه بيقولها طول عمره فيخليك تصدقه ، ودي النقطة اللي هعدي وآكد عليها في المرحلة الجاية من المقال.

ودلوقتي خلينا نخش ف الموضوع ونبدأ العد

۱- علواني .. فيلم الأرض

انت غالباً شفت فيلم الأرض ، ولو ماشفتوش فانت محتاج تشوفه حالاً ، وحتى لو شفته ، طالما جاتلك فرصة تشوف الأرض شوفه ، والأسباب لا تنتهي ، لكن خلينا في السعدني اللي غالباً لو كنت شفت الأرض ماكنتش هتاخد بالك إنه ف الفيلم أصلاً ، لسبب مهم إنه كان شاب جداً مش شبه الصورة اللي اتعودنا عليها منه ، ودوره كان ثانوي جداً ، بالرغم من كدة ظهوره ماكانش قليل ، لذلك خليني أطلب منك في مشاهدتك القادمة للأرض تركز شوية زيادة معاه ، هتلاقي نفسك بتقول والله الممثل الشاب دة واعد وباين عليه الموهبة وممكن يبقى ممثل كبير ، وطبعاً انت عارف اللي بعد كدة.

۲- أستاذ جوهر .. فيلم شحاذون ونبلاء

خليني أغششك وأقولك إن دة دوري المفضل لصلاح السعدني في السينما على الإطلاق ، يعني في حالة لو مهتم تعرف.

أستاذ جوهر من نوعية الأدوار اللي بتبقى صعبة جداً ع الممثل ، لأن الشخصية اللي بيجسدها بيكون وراها فكرة عايز يعبر عنها الكاتب ، ولأداء النوعية دي من الشخصيات بتحتاج ممثل على قدر كبير من الثقافة والإطلاع ، عشان يكون مستوعب الفكرة اللي ورا الشخصية ، وف نفس الوقت يقدر يلتزم بالجانب الإنساني اللي فيها ويخليها لحم ودم فتصدقها.

كمان خليني أرجع لنقطة الأداء الصوتي اللي ذكرتها في البداية ، فهو هنا بيجسد دور رجل مثقف وبيتكلم على لسانه ويمررلك كلام فلسفي معقد بشكل يخليك تعرف تستوعبه وتمضغه ، يعني هو هنا بيقول ( كلام كبير ) بس بشكل يخليك قادر تفهم هو عايز يشاورلك على إيه وتبص فين ، ودي مَلَكة مش هينة أبداً لو تعلمون.

وع الرغم من إن الأداء الصوتي هو سلاحه الفتاك اللي بيحتل بيه الشاشة عادةً ، إلا إنه أغلب الوقت بيعبر بعينيه وبيكتفي بمشاركة صامتة ، ودة جزء كبير من لُب شخصية أستاذ جوهر.

۳- عبد الواحد .. فيلم فوزية البرجوازية

دة مثقف آخر زي أستاذ جوهر ، بمعنى إنه واسع القراءة والإطلاع ، ولكنه نموذج تاني وشخصية مختلفة في حدوتة بعيدة خالص عن حدوتة شحاذون ونبلاء ، برغم إن الإتنين في الحارة المصرية بالمناسبة ، وهنا يبرز برده عامل الثقافة عند صلاح السعدني ، فهو مش واقع في فخ التنميط ، وقادر يفهم الفرق بين حد زي عبد الواحد وزي أستاذ جوهر ، بالرغم إن الإتنين ممكن نطلق عليهم مثقفين ، ودة فخ بيقع فيه كتير من ممثلين دلوقتي ، هعمل دور الظابط يبقى هنفش صدري وأتخن صوتي ، هعمل دور الشعبي يبقى هطجن وأعوج بقي ، بغض النظر الشخص دة جواه إيه ولا تركيبته إيه.

فيلم فوزية البرجوازية من الأفلام المظلومة جداً جداً في رأيي ، وخليني أوعدك إنك مش هتبطل ضحك هستيري من أول الفيلم لحد ربعه الأخير مثلاً ، والسعدني بيتشارك مع إسعاد يونس وسناء شافع في لعب دور مثقفين وسط ناو اللي بيقعدوا يرطنوا بمصطلحات معقدة وأسماء كتاب روس ماتعرفش هم مين فماتفهمش منهم حاجة ، إسعاد تحسها بتتعمد المبالغة ف الأداء عشان تتريق ع الشخصية اللي بتلعبها فمش بتصدقها وبالتالي مش بتضحك لأنك حاسس الممثل بيسخف ع الشخصية اللي بيلعبها ، أما السعدني أكتر واحد هيضحكك فيهم لأنه - خد بالك من دي - بيأدي الشخصية بجدية وبصدق ، فانت لما هتلاقي حد مصدق قوي الهرتلة اللي بتتقال دي هتلاقي نفسك بتضحك ، وتاني ندي السوكسيه لأدائه الصوتي اللي بيوحيلك إن الراجل دة قضى عمره في القراءة فبتسمع منه لغة عربية تطرب الودن فعلاً.

٤- وكيل النيابة حسن أبو ضيف .. فيلم الغول

صلاح السعدني هنا بيقدم نسخة عن وكيل نيابة ، مفيش شبهها في أي فيلم مصري آخر لو لم تخني الذاكرة.

حسن أبو ضيف هو رجل لا يفتقر إلى الحيلة ولا الذكاء ، ولا ينقصه الحماسة ولا الرغبة في تحقيق العدل ، لكنه بيظهر عاجز جداً على مدار الفيلم ، وتطوره هنا هو في إدراكه مدى عجزه وضعفه عن تحقيق العدل اللي هو الهدف من مهنته في الأساس ، والغريب إن اللي بيعوقه عن كدة هو مهنته نفسها وقواعدها اللي بتقيده أكتر ما بتساعده ، لذلك هو طول الوقت بيكتفي إنه يقول لبطل الفيلم ( دي مش هقدر أعملها .. روح اعملها انت على مسئوليتك ) .. وهو دور مهم جداً في سياق الفيلم ، لو أخذت بالاعتبار الكادر الافتتاحي ليه .. و- كالعادة - له مرافعة قرب النهاية بلغة عربية فصحى ممتازة.

٥- المقدم سعيد أبو الهدى .. فيلم ملف في الآداب

دي شخصية تشابه جداً شخصية المفتش چاڤير من رواية البؤساء ، رجل الأمن اللي بيتعامل مع المجرمين بمنطق الكراهية والثأر الشخصي مش بمنطق تحقيق العدل ، ودة بيعميه عن رؤية أي منطق وبيخليه جداً مندفع ورافض يسمع أي صوت عقلاني ، وفي خلال دة ممكن يظلم إنسان بريء بشكل متعسف ، وحجته في كدة إنه قوي في الحق وبيشوف شغلته الخطيرة الحساسة ، ودي الشعرة ف النوعية دي من الأدوار إن الممثل يخليك قادر تشوف ببساطة إنه رجل بيسعى للانتقام مش راجل بيشوف شغله ، حتى وهو بيقول عكس كدة ، السعدني في ( ملف في الآداب ) من المرات النادرة اللي ماتقدرش تتعاطف معاه على مدار الفيلم ، لكنه ف ثانية بيقلب مشاعرك ناحيته ويخليك تشوف الكسرة ورا الوجه الصارم القاسي .. أداء عبقري وكالعادة مش واخد حقه من الأضواء

٦- كريم جمال الدين .. فيلم بنات في ورطة

دة فيلم غموض وتشويق تسعيناتي ( ثريلر ) متوسط الجودة - ربما أقل - جايز تحبه جايز لاء ، لكن الأكيد إنك هتحب أداء صلاح السعدني فيه.

لو انت زهقت من كلامي عن الأداء الصوتي للسعدني فاطمن ، ف الفيلم دة السعدني بيستخدم عينيه أكتر من أي حاجة ، لأن التحدي الأقوى إن صوته يكون طبيعي بسيط محايد ، بيقول اللي بيتقال ف المحادثات الودية العادية ، لكن العين محملة بغضب مكبوت ، ونظرات جنون بتخفيها العين اغلب الوقت لكنها بتفلت في لحظات ، وتنفجر في لحظات تانية.

صلاح السعدني بيلعب دور سايكو ( هتشكوكي ) جداً ، لو انت بتحب أفلام هتشكوك حيث قاتل الشقراوات هو ألطف وأوسم رجل في الفيلم فانت هتحس أداء السعدني هنا جاي من هذا العالم لدرجة إن لو هتشكوك شافه كان هيتمنى لو ياخده معاه ، طبعاً دة مش حرق لأنك بتعرف المعلومة دي من البداية ودة طبيعي ف أفلام هتشكوك.

٧- أحمد السيد عليش .. فيلم المراكبي

هنا بنخوض رحلة من عالم الأساطير الإغريقية ، أوديسيوس وهو بيحارب الوحوش ويعبر المحيطات أثناء محاولته العودة لوطنه ، وأوديسيوس هنا هو راجل مراكبي بسيط بيقوم بدوره صلاح السعدني ، راجل من اللي بيجيب رزق اليوم بيومه ، والوحوش هم موظفين القطاع الحكومي اللي عمالين يجيبوه ويودوه في دهاليز البيروقراطية والورق والأختام والدمغات وكل الحاجات دي اللي أنا وانت حافظينها من زيارات السجل المدني ، هنا بقى السعدني بيتكلم بلسان مش شخص بقى مثقف ومتنور ، لاء دة شخص مايعرفش شكل حرف الألف أصلاً ، شخص مذهول وحيران بيكتشف إنه عايش ف كوكب موازي وإن العالم أكبر بكتير من المركب الصغير اللي هو عايش فيها.

۸- مسعد .. فيلم أغنية على الممر

فيلم أغنية على الممر من أشهر الأفلام اللي اتكلمت عن النكسة ، لكني ماشفتوش للأسف ، بس قلت استغل الفرصة ونتفرج عليه سوا.

طبعاً خلينا نقول اللي فات دة لا يعتبر تقرير ولا دراسة عن صلاح السعدني ، إنما ممكن نسميها العصارة أو اللمونة أو الزتونة أو البرشامة ، لجانب من جوانب كتير تخص الفنان الكبير ، واللي حابب يطلع على حاجة دسمة تخص السعدني ممكن يتفرج على مجموعة حلقات ( الموهوبون في الأرض ) اللي عملها الصحفي والسيناريت بلال فضل ، أو كلام الصحفي آدم مكيوي عنه في لقائه على قناة ( بتاع أفلام ) على يوتيوب ، هيكون فيهم مادة دسمة وممتعة جداً.

المهم لما تتفرج ع الأفلام دي ، ماتنساش ترجع تكتبلي رأيك فيها في التعليقات ، وقولي إيه دورك المفضل من الأدوار اللي ذكرتها فوق ، ولو عندك دور سينمائي آخر للسعدني نسيت أقوله ، ياريت ترشحه ليا ولباقي القراء وأكون شاكر ليك جداً.

رحمة الله على الفنان الجميل صلاح السعدني